Twı ra cehd, mı ra murad

 Kekê Fexredin, şıma eşkeni xwı bıdi şınasnayış? Şıma seni koti miyon eni gureyi?

Ez Çolig ra wa. Suelaxon ra, dewê Qela ra wa. Qela Gınc ra nızdi ya. Ma mezrayê Qela ra yê. Ez çoras dı serre ya. Qela ra hetê dadi ra ez Begon ra wa. Hetê buabi sera zi tuerni Suafi Sıdıq Meh a. Wendışi mı zi çiniyo. Ez ayê vaci. Mı teber ra wend. Mı mekteba verin teber ra wend, mekteba miyonên u lise zi mı teber ra wend. Ma henzar new se u dı dı şiyi Edena. Ma uca ra zi şiyi İstanbuel. Ez zemanêk uca dı menda. Mı sinema ra hes kerdên. O wext rehmeta buabiyê mı ma rê qalê weliyon kerdên. Mı zi yi ra vatên “Bawo, wextona ez bıbi gırd, ez filimê weliyon oncena”. Wext vêrt şı, ma koti enı gure. Ez bı xwı, mı TGRT dı dest kerd pê enı gure u ma filim onti. Vist serri mı sinema dı vêrti. Ez uca dı çayci biya. Ez bajna biya ışıxçi, bajna zi görüntü yönetmeni. Yow qal esta, vonu “Twı ra cehd, mı ra murad”. Eg tı bıwazi rabbil âlemin zi nasib keno. Şıma zoni wext degış bı. Hukumat zi degış bı.

Ma dı henzar u des dı niyet kerd, ma omeyi etya. Ma dest kerd pê, ma ombazon dı omeyi yowca, ma resayi yowbin. Filimê ma pê yow butçeya gırd niomeyi ontış, yow qamerayê ma estbi.

Kekê ra ver filima Zazakiya derg omeyibi ontış?

-Wezaretê Kultur ra ma nieşkayi izin veco. Ma filim qedina, montaj yê vıraşt la ma nieşkayi lisans bıgır. Ez şin u omên, mı ra tercuman waştên. O wext tercuman çi zi çinibi. Mı mudirê İstanbuel ra rica kerd, mı va ruecêk bêrên filim seyr bıkerên. Pê çımon xwı bıvinên, çıta tede esto, çıta ra behs keno. Uca ra pê ma semedê televizyon cehd kerd. Ma va ma filimê xwı TRT Şeş dı bımuejn ra. Çımıg sermayeyê filim perê yi. Pereyi twı bıbi tı eşkeni filim bıonci. Ma vatên ma filim bıd yın.     

Şıma seni dest kerd pê?

Mı ‘ewil Avni Polat dı qıseyi kerdi. Yi zi va sare u çımon mı ser. Dı hirye heval estbi. Yi zi omeyi, yow qameraya qıj mı dı biyi. Ena filimê ma, dı aşmon dı, internet ra şiyes henzar ten seyr kerda. Tecrube zaf muhim o. Ma zeg Yeşilçam dı filim ontên yow dolmuşê ma bıbi, çayci zi, idareker zi, aktori zi a minibus dı biyi. Enka imkoni biyi zaf.

Ma filime xwı dewıjon dı vıraşt. Ma ewil senaryo qedina. Bajna ma mekan bellu kerd. Ma Kuertew dı, Çolig merkez dı, u Suelaxon merkez u Qela dı ma filime xwı ont. Ma senaryo ra dıma ma sahneyun ontên. Mı o wext ombazon xwı dı qal kerdên. Mı vatên temayê filimê ma ena ya. Şıma zi guerê enê kay bıkerên. Ma filime xwı vengın vıraşt. Yani ma vengi kaykeron direkt uca dı qeyd kerd. Ma bajna zi İstanbuel dı veng kerd pak. Yow wexto kılmek dı ena filim qedinayış-ma raşta vacı-lutufê Homa Teala bi.

Temayê filimê şıma çı bı? Dehkera çı bı?

Filim dı yow merdum extiyar u yow zi tuerni yi esto. Çolig dı extiyar têna monên. Filimê ma dı zi o extiyar u tuerni yi kay keni. Çolig dı zeg deston ma ra gurı yen, ma hem şini mekteb, ma hem şini dıwar het. Ma hini nivındên. Temaya dıyın zi mısafırti ya. Ma ena xusus dı zi sınıf dı mênd. Zerr waştên ki ma yow gurewo têna hol bıkır. Ma guerê butçeye xwı hereket kerd.    

Ma nieşkayi filimê xwı TRT 6 dı bımuecni! La honc zi Wezaret dı (Bakanlık) nuşte wo ki 2012 dı ena filima Zazakiya ‘ewil bı deston fılon merdum omeya vıraştış. Eni zi yow murad o! Sinema, gureyi sinayış o, güreyi hes kerdış o! Ayê ki enı gure ra hes keni, wa cesur bi. Bı yow qamera u yow proje merdum eşkeno her çi bıkero!