VIRASTOXUNÊ MUZİKÊ ZAZAKİ SERO

Piyasa u inernet de zof lawıkê Zazaki roşinê, benê ve vıla. Zofe sınatkari zonê Zazaki de  lawıku vanê. Niyê ke ho sınatkar ilan kerdo, dinu ra zofe Zazaki nêzonenê. Lawıku kenê ezber, ẋelet vanê.

Gosedarê ke na lawıkunê ẋeletu gos danê, dinu ra zofê Zazaki ya rınd ya ki qe nêzonê. Dae ra ni gosedari nêvinênê ke, çıturi zonê Zazaki eve na lawıku roze ve roze goni kenu vindi, beno ve feqir u xırave.

Ma besêkeme na sınatkaru 4 komelu de araze u tarıf bıkerime:

1. Naê ke Zazaki muzik vırazenê, dinu ra zofê teney Zazaki nêzonenê. Dae ra lawıkunê Zazaki ẋelet vanê. Ni wazenê ke wayirê nam san bê. Wazenê ke eve muzikê Zazaki wayirê pere u pulê na dina bê, maldar bê. Hedefê ni lawıkvatoẋu Zazaki rê xısmete kerdene niya. Ni Zonê Zazaki kenê xan u xırave.

Naê ke eve muzik Zazaki kenê ve xırave, żêderê. Naynu ra taê eve rotisê muzikê Zazaki rındi biye ve maldar. Ni heto zu ra goniya mıletê ma line, heto bin ra zarar dane ve zonê ma Zazaki.

2. Zazaê ke Tırki lawıku vanê, zeraro bêdavan (gırs) danê ve Zazaki. Tırki lawıku vatene ra zofe teney zê Arif Saẋi bi ve wayirê nam u sani, bi ve maldari. Çıke mıletê ma sınatkarunê żê Arif Saẋi gos dano, niya beno ve Tırk. Niya Zazaki beno ve zar, Tırki avê sono.  

3. Xeylaê teney ki muzikê Zazaki seweta ideolożiyê Kurdu u seweta idelożiyê Hermenü vırazenê. Tavi komelê Hermenü u iyê Kurdu ra naynu rew rew vezenê ve sahna, CD´unê dinu herinenê. Komelê Hermenü u iyê Kurdu cêvunê na vêsanu kenê ve pıṙ. Na tayfa ki ho niya rosena.   

4. Naê ke eve esq u zerêowes muzikê Zazaki, seweta zonê Zazaki vırazenê, i biyê senık. Hama Haq rê sıkır bo, hona estê. Ni cuanıki u cuamerdiyê ke Zazaki pak u rast vanê, pê zonê Zazaki kay nêkenê. Zonê ma seweta Kurki u Hermeniki nêwurnenê, xırave nêkenê. Raa Sey Qażi u iyê Saheyderi ramenê. Ni sınatkarê ma eve lawıku, Zazaki ideolożünê Kurdu u iyê Hermenü rê malzeme nêkenê.

KILMEK RA

Mıleto Zaza rınd organize nêbiyo. Hama seweta organize biyaene, sıfte kerdo. Mıletê ma ke parti u camatê ho vıraşti, parti u camatê Zazau, u waxt naê ke Zazaki ẋelet vanê, kenê ve xırave, inu sılayiya sewu nêkenê. U waxt şikime, naê ke Zazaki kenê ve xırave, inu teşhir bıkerime.

Hama ma nıka ra şikime, naê ke eve muzik Zazaki kenê ve xırave, CD´unê dinu protesto bıkerime, mehernime. Sewe ke i vêżinê sahna, i sewu meşerime. Ancax niya têsirê aẋuyê dinu beno ve kemi.

Kamo ke vano: „Ez zonê cedê ho Zazaki ra has kenu.", gune hetê ilim ra famê ho bıżedno, çımunê ho rakero, tahliku bıvino.